Raina: ‘ஐபிஎல்லதான் இடம் கிடைக்கல’…எனக்கு இந்த அனுமதியாவது கொடுங்க: பிசிசிஐக்கு ரெய்னா கோரிக்கை!

Raina: ‘ஐபிஎல்லதான் இடம் கிடைக்கல’…எனக்கு இந்த அனுமதியாவது கொடுங்க: பிசிசிஐக்கு ரெய்னா கோரிக்கை!

இந்திய அணியின் முன்னாள் அதிரடி ஆட்டக்காரரும், சிஎஸ்கேவின் முன்னாள் நட்சத்திர வீரருமானசுரேஷ் ரெய்னா, சர்வதேச கிரிக்கெட்டில் இருந்து தோனியுடன் சேர்ந்து ஓய்வை அறிவித்திருந்தார்.

இதனைத் தொடர்ந்து ஐபிஎல் தொடரில் மட்டும் பங்கேற்க ரெய்னா திட்டமிட்டிருந்த நிலையில், சிஎஸ்கே நிர்வாகத்துடன் ஏற்பட்ட பிரச்சினை காரணமாக 2020ஆம் ஆண்டு ஐபிஎல் தொடரில் பங்கேற்கவில்லை. இதனைத் தொடர்ந்து கடந்த வரும் சிஎஸ்கேவுக்காக விளையாட வந்த நிலையில், பார்ம் அவுட்டை காரணம் காட்டி பல போட்டிகளில் சேர்க்கவில்லை.

வாங்கவில்லை:

அடுத்து, இந்த 15ஆவது சீசனுக்கு முன்பு நடைபெற்ற மெகா ஏலத்தில் சுரேஷ் ரெய்னாவை சிஎஸ்கே ஏலம் எடுக்கவில்லை. சிஎஸ்கே கையில் 2+ கோடி ரூபாய் மிச்சம் இருந்த நிலையிலும், நிர்வாகம் இவரை வாங்காதது ரசிகர்கள் மத்தியில் அதிருப்தியை ஏற்படுத்தியது. மற்ற அணிகளும் ரெய்னாவை அடிப்படி தொகை 2 கோடிக்கு வாங்க முன்வரவில்லை.

ஆசைப்படுகிறேன்:

இதனைத் தொடர்ந்து ரெய்னா தற்போது ஐபிஎலில் வர்ணனை செய்யும் பணியில் ஈடுபட்டு வருகிறார். இந்நிலையில், சமீபத்தில் பத்திரிகை ஒன்றுக்குப் பேட்டிகொடுத்திருந்த ரெய்னா, தான் மீண்டும் ஐபிஎலில் பங்கேற்க ஆசைப்படுகிறேன் எனத் தெரிவித்திருந்தார். இதற்கு தயாராகுவதற்கு பிசிசிஐயிடம் ரெய்னா ஒரு முக்கிய கோரிக்கையை முன்வைத்துள்ளார்.

பிசிசிஐக்கு கடிதம்:

அந்த கோரிக்கை கடிதத்தில், ‘‘பிசிசிஐயுடன் ஒப்பந்தத்தில் இல்லாத வீரர்கள், ஐபிஎலில் தொடரிலும் ஏலம் எடுக்கப்படாவிட்டால் அவர்களுக்கு வருமானம் இல்லை. இதன் காரணமாக வெளிநாட்டு தொடர்களில் எங்களை போன்ற வீரர்களை விளையாட அனுமதிக்க வேண்டும்’’ என ரெய்னா வேண்டுகோள் விடுத்துள்ளார்.

பிசிசிஐ விதிமுறை:

பிசிசிஐ விதிமுறைப்படி, இந்திய அணிக்காக விளையாடிய வீரர், வெளிநாட்டு பிரிமியர் லீக் தொடர்களில் பங்கேற்று விளையாட முடியாது. பிசிசிஐயில் இருந்து விலகிவிட்டு, அதற்கான கடிதத்தை பிசிசிஐயிடம் இருந்து பெற்றுவிட்டு வேண்டுமானால், வெளிநாட்டு தொடர்களில் பங்கேற்க முடியும். அப்படி பங்கேற்றால், ஐபிஎல் போன்ற இந்தியாவில் நடைபெறும் தொடர்களில் பங்கேற்க முடியாது.

ரெய்னாவின் விருப்பம்:

யுவராஜ் சிங் கூட இந்திய கிரிக்கெட்டிலிருந்து விலகி, சில வெளிநாட்டு தொடர்களில் பங்கேற்று விளையாடினார். அதன்பிறகு மீண்டும் பஞ்சாப் அணிக்கு விளையாட ஆசைப்பட்டார். ஆனால், பிசிசிஐ இதற்கு சம்மதம் தெரிவிக்கவில்லை. இதனால், இந்த விதிமுறையை மாற்றியமைக்க வேண்டும் என ரெய்னா விரும்புகிறார்.

ரெய்னா பேட்டி:

இந்த விவகாரம் குறித்து தனியார் பத்திரிகை ஒன்றுக்குப் பேட்டிகொடுத்த அவர், ‘‘பொதுவாக, வெளிநாட்டு வீரர்கள் பார்மில் இல்லாதபோது இந்தியா வந்து ஐபிஎலில் விளையாடி பார்முக்கு திரும்புகிறார்கள். அதேபோல இந்திய வீரர்கள் பார்முக்கு திரும்ப வெளிநாட்டு தொடர்களில் பங்கேற்க அனுமதி வழங்க வேண்டும். இதனால், எங்களை போன்றவர்கள் மீண்டும் ஐபிஎல் தொடரில் இடம்பெற வாய்ப்புகள் உருவாகும்’’ எனக் கூறினார்.